WATU ZAIDI YA 20 WAUAWA KWA KUKATWA MAPANGA MJINI BENI

 Watu zaidi ya 20 wameuawa nje kidogo ya mji wa Beni mashariki mwa jamhuri ya kjidemokrasia ya congo, baada ya kundi la watu wasiojulikana kukivamia kijiji cha Mayangos usiku wa kuamkia leo siku ya jumatano. Maafisa wa polisi wamebainisha.

Wakuu wa serikali pamoja na maafisa wa jeshi la umoja wa mataifa, Monusco wanasema waasi wa Uganda kutoka kundi la ADF Nalu ndio wametekeleza mauaji hayo.

Mauaji haya yanafanyika siku chache baada ya jeshi la serikali ya DRC, FARDC kutangaza kuwa limeanza mpango wa kupambana na waasi wa kihutu toka Rwanda wa FDLR, mashariki mwa nchi hiyo.

Tangu mwezi oktoba hadi desemba mwaka wa jana watu mia mbili na sitini waliuawa katika maeneo hayo ya Beni, wengi wakikatwa kwa mapanga, majambia, na visu, hali kadhalika kwa silaha; huku vikosi vya jeshi la serikali vikielezea kuwa juhudi za kutokomeza waasi zinaendelea.