MAREKANI YAITAKA DRCONGO KUTHIBITISHIA KWAMBA UCHAGUZI UTAFANYIKA MWAKA 2016

Rais Obama na Russ Feingold

Serikali ya Washington inasisitiza msimamo wake wa kutaka kalenda ya jumla ya uchaguzi nchini Jamhuri ya Kidemokrasia ya Congo itangazwe na Tume ya Uchaguzi CENI haraka iwezekanavyo.

Kauli hiyo ya Marekani imetolewa na Mjumbe maalum wa Rais Obama katika Ukanda wa Maziwa makuu Russ Feingold katika mukutano na waandishi wa habari hapo jana mjini Kinshasa.

Hadi sasa, Tume hiyo imechapisha ratiba ya uchaguzi wa serikali za mitaa, wa manispaa na miji uliyopangwa kufanyika mwaka huu, lakini Marekani inaamini kuwa kupitishwa kwa sheria mpya ya uchaguzi kungeweza kuharakisha kutolewa kwa kalenda hiyo, amesema Russ Feingold.

Aidha, Fengold amesisitiza kuwa lazima uchaguzi wa rais ufanyike kabla ya mwisho wa mwaka 2016 ambapo Rais Joseph Kabila anatarajiwa kuachia ngazi, na kuongeza kuwa nchi yake inatetea makabidhiano ya madaraka kwa njia ya amani na ya kidemokrasia nchini DRC na barani Afrika.

Kuhusiana na ucheleweshwaji unaoweza kusababishwa na ukosefu wa fedha katika uchaguzi huo, Feingold ametangaza msaada wa nchi yake wa dola za kimarekani milioni 20, na kusisitiza kuwa ukosefu wa fedha hauwezi kuwa sababu ya kutofanya uchaguzi nchini DRC.