SERIKALI YA DRCONGO YAPUUZIA MAKATAA YA UMOJA WA MATAIFA YA KUWAFUTA KAZI VIONGOZI 2 WAJUU WA JESHI

Serikali ya Jamhuri ya Kidemokrasia ya Congo imetupilia mbali makataa yaliotolewa na Umoja wa Mataifa ulioipa majuma mawili serikali hiyo kuwafuta kazi maofisa wake wawili wa juu wa jeshi kwa tuhuma za kushiriki vitendo vya uvunjifu wa haki za binadamu,

Ma Jenerali hao Bruno Mandevu na Sikabwe Fall, ndio waliopewa jukumu la Operesheni dhidi ya wapiganaji wa kihutu waliopiga kambi kule mashariki mwa Jamhuri ya kidemokrasia ya Congo.

Katika taarifa yake kwa waandishi wa habari, msemaji wa Serikali ya DRC na pia waziri wa habari, Lambert Mende, amesema kuwa Serikali yake hiwafuti watu kazi kwa shinikizo na hasa maofisa wa juu wa jeshi kwakuwa maofisa waliotajwa kwenye ripoti hiyo hawajashtakiwa kwenye mahakama ya kijeshi.

Juma hili Umoja wa mataifa umetishia kusitisha operesheni zake za pamoja na majeshi ya Serikali ya DRC katika vita dhidi ya makundi ya waasi mashariki mwa nchi hiyo iwapo utawala wa Kinshasa hautawafuta kazi majenerali hao wa jeshi.