MAANDAMANO YA WAANDISHI WA HABARI NCHINI BURUNDI YATAMATIKA BILA VURUGU YOYOTE

Zaidi ya waandishi wa habari 150 pamoja na wanaharakati wa kutetea haki za binadamu nchini Burundi, hii leo wameandamana kushinikiza kuachiwa huru kwa Bob Rugurika mkurugenzi wa kituo cha redio ya RPA anayeshikiliwa na polisi kwa tuhuma za kuhusika na mauaji ya watawa watatu raia wa Italia.

Bob Rugurika mkurugenzi wa kituo cha redio cha RPA alikamatwa kati kati ya mwezi January mwaka huu saa chache baada ya kituo chake kurusha mahojiano ya mtu mmoja aliyedai kuwa ni miongoni mwa watu waliohusika na mauaji ya watawa hao.

Waandamanaji hao walikusanyika nje ya majengo ya mahakama kuu mjini Bujumbura, Burundi walikaidi amri ya meya wa jiji aliyewataka wasifanye maandamano hayo, lakini katika hatua ya kushangaza polisi waliwaacha waandamanaji hao wakusanyike.

Patrick Nduwimana mmoja wa waandishi wa habari na mwanachama wa muungano wa chama cha waandishi wa habari nchini humo, amesema kuwa lengo la maandamano yao ni kuendelea kudai haki na kushinikiza kuachiwa kwa Rugurika.

Kukamatwa kwa mkurugenzi wa kituo hiki kumeendelea kuzusha hofu ya kiusalama hasa kwa waandishi wa habari na wanaharakati ambao wameendelea kukamatwa na vyombo vya dola nchini humo kwa tuhuma mbalimbali, hali ambayo wachambuzi wa mambo wanaona kuwa ni kutaka kuminya uhuru wa watu kutoa maoni yao wakati huu nchi hiyo ikijiandaa kufanya uchaguzi wake mkuu.