JESHI LA NIGER LAJIUNGA KATIKA KAMPENI YA VITA DHIDI YA BOKO HARAM

Serikali ya Niger inajiandaa kutuma wanajeshi wake kupigana sambamba na majeshi ya nchi jirani dhidi ya kundi la kiislamu la Boko Haram saa chache baada ya mamia ya watu kuuawa kwenye mashambulizi yaliyotekelezwa na wapiganaji hao kwenye mpaka wa nchi ya Niger na Nigeria.

Kuingilia kati kwa majeshi ya Niger kwenye vita dhidi ya kundi la Boko Haram, kutaongeza nguvu ya majeshi mengine ya nchi jirani kutokea kaskazini mwa nchi hiyo katika kukabiliana na wapiganaji hao ambao katikati ya wiki hii waliwaua wanajeshi 19 kwenye mpaka na nchi ya Cameroon mjini Gambori.

Mashambulizi ya kundi la Boko Harama yametekelezwa saa chache baada ya majeshi ya Chad kuingia kwenye mstari wa mbele wa mapambano na kufanikiwa kuuchukua mji wa Gambori na kutangaza kuwauwa zaidi ya wapiganaji 200 wa kundi la Boko Haram.

Kwa mujibu wa msemaji wa Serikali ya Niger, bunge la nchi hiyo linatarajiwa kuketi siku ya Jumatatu kupiga kura kupitisha mpango wa Serikali kutuma wanajeshi wake kuungana na vikosi vya Cameroon, Chad na Nigeria kuwakabili wapiganaji wa kundi hilo.

Zaidi ya raia elfu 3 wameuawa toka kundi hilo lilipoanza uasi mwaka 2009, huku wengine nusu milioni wakilazimika kuwa wakimbizi ndani ya nchi yao.