SERIKALI YA DRCONGO YAKATAA KUSHIRIKIANA NA MONUSCO KATIKA OPERESHENI DHIDI YA FDLR

Serikali ya Jamhuri ya Kidemokrasia ya Kongo, DRC imesema kuwa imekataa ombi la tume ya Umoja wa mataifa nchini humo kushirikiana na jeshi lake katika operesheni ya kuwasambaratisha wapiganaji wa kundi la FDLR, na kutoa onyo dhidi ya taasisi za kimataifa kuingilia masuala yake ya ndani.

Juma lililopita, tume ya Umoja wa Mataifa ilitangaza kujiondoa katika operesheni ya pamoja na jeshi la Serikali ya DRC, kushiriki operesheni maalumu ya kuwasaka waasi wa Rwanda wa FDLR kwa kile umoja wa mataifa unataka kwanza majenerali wawili wa juu wa jeshi la DRC wafutwe kazi kwa tuhuma za kuhusika na vitendo vya ukiukwaji wa haki za binadamu.

Waziri wa habari na msemaji wa serikali ya DRC, Lambert Mende, amesema serikali yake inakataa rasmi ombi la Umoja wa mataifa na kwamba wanajeshi hao hawatafutwa kazi kwa shinikizo na kuzionya taasisi za Umoja huo kutoingilia masuala yake ya ndani.