WATU ZAIDI YA 22 WAPOTEZA MAISHA KATIKA AJALI YA NDEGE NCHINI TAIWAN

Watu 22 wameripotiwa kufa mpaka muda huu baada ya ndege ya abiria inayomilikiwa na shirika la TransAsia ya nchini Taiwani kuanguka kwenye mto mmoja mjini Taipei ikiwa na watu 58, hii ikiwa ni ajali ya pili katika kipindi cha miezi 7.

Kwa mujibu wa mashuhuda wa tukio hilo wamedai kuwa ndege hiyo aina ya ATR 72-600, ilionekana kupoteza uelekea na kukosakosa baadhi ya majengo yaliyokuwa jirani na daraja linalopitisha maji ya mto Taipei.

Polisi wanasema kuwa mpaka sasa wamefanikiwa kuopoa miili ya watu 22 na wengine wakiwa hai huku zoezi la kuokoa watu zaidi likiendelea wakati huu ambapo wataalamu wa masuala ya ndege wakiwa wamefanikiwa kupata visanduku vya sauti vya ndege hiyo.

Awali baadhi ya vituo vya redio na televisheni vilionesha na kurusha matangazo ya sauti walizodai ni kutoka kwenye kisanduku cha sauti cha ndege hiyo, ambapo marubani wa ndege hiyo walisikika wakiomba msaada wa dharura baada ya moja ya injini zake kuwaka moto.

Hata hivyo polisi wamekanusha taarifa hizo wakidai kuwa licha ya kuvipata visanduku vya sauti, hawajaanza uchunguzi wala kufanikiwa kusikiliza mawasiliano ya mwisho ya marubani hao.