MUHAMED BUKHARI AUNGWA MKONO NA VIONGOZI WA MAKANISA NCHINI NIGERIA

Ikiwa ni takriban majuma mawili yamesalia kabla ya wananchi wa Nigeria hawajapiga kura kwenye uchaguzi mkuu wa rais, chama tawala nchini humo kinakabiliwa na mtihani mwingine wa kisiasa baada ya viongozi kadhaa wa makanisa nchini humo kuonesha kumuunga mkono kiongozi wa upinzani.

Wakati wachambuzi wa mambo wakiendelea kumpa nafasi rais Goodluck Jonathan kuibuka na ushindi kwenye uchaguzi wa February 14 mwaka huu, wataalamu wanadai kuwa kuna mambo mawili ambayo yanaweza kukiondoa chama tawala cha Peoples Democratic madarakani.

Wataalamu hao wanasema kuwa cha kwanza ni uungwaji mkono wa kiongozi wa upinzani Muhamadu Buhari na waumini wa dini ya kikristo kusini mwa nchi hiyo, na kutoungwa mkono kwa rais Jonathan katika maeneo yenye waumini wengi wa Kiislamu.