RWANDA YAADHIMISHA MIAKA 20 TANGU KUTOKEA MAUAJI YA KIMBARI, YAITENGA UFARANSA KUSHIRIKI

Viongozi wa serikali wa serikali ya Rwanda, wamesitisha mualiko wa Balozi wa Ufaransa jijini Kigali Michel Flesch wa kuhudhuria kwenye maadhimisho uya kumbukumbu ya miaka 20 ya mauaji ya kimbari nchini Rwanda ya mwaka 1994 na kumzuia kuiwakilisha Ufaransa.

Balozi Flesch hatochukuwa tena nafasi ya waziri wa sheria Christiane Taubira ambaye angeliongoza ujumbe wa serikali ya Ufaransa kwenye maadhimisho hayo jijini Kigali.

Safari ya waziri wa sheria wa Ufaransa na ujumbe wake kwenye maadhimisho hayo ilisitishwa baada ya kauli ya rais wa Rwanda Paul Kagame kuituhumu Ufaransa kuhusika moja kwa moja katika kupanga mauaji mauaji hayo na kushiriki katika utekelezwaji wake.

Balozi Flesch amesema hapo jana saa nne na nusu za usiku alipokea simu ya waziri wa Rwanda anayehusika na mambo ya nje Louise Mushikiwabo kwamba wamefuta mualiko wake, na hivo hapashwi kuhudhuria sherhe hizo kwenye Uwanja wampira wa Miguu wa Amahoro jijini Kigali ambako Rais Paul Kagame atazinduwa rasmi sherehe hizo.

Mbali na kukataliwa kuhudhiria katika sherehe hizo, balozi Flesch amesema amezuiliwa pia kwenda katika eneo la Ukumbusho Memorial huko Gisozi kwa ajili ya kuweka shahada ya maua.

Ufaransa ambayo ilikuwa mshirika wa karibu wa rais Habyarimana mwaka 1994 na ambayo inatuhumiwa kuhusika katika mauaji hayo, imefuta ushiriki wake katika sherehe hizo baada ya matamshi ya rais Paul Kagame na baadae kufahamisha kwamba itawakilishwa na balozi wake jijini Kigali.

Mvutano huu mpya baina ya serikali ya Kigali na Paris unaashiria kusitishwa kwa harakati za kurejesha katika hali ya kawaida mauhusiano kati ya mataifa haya mawili licha maridhiano yaliofikiwa mwaka 2010 na ambapo mahusino yamekuwa sio imara. Katika mwaka 2010 Ufaransa ilikiri kufanya makosa , lakini imekataa kuomba radhi kama inavyo ombwa na Kigali.