BUNGE LA AFRIKA MASHARIKI LASITISHA VIKAO VYAKE BAADA YA KUIBUKA MVUTANO BUNGENI

Bunge la Jumuiya ya Afrika Mashariki limelazimika kusitisha vikao vyake kwa muda usiojulikana kufuatia kuibuka kwa malumbano ya kisheria katiu ya wabunge kuhusu njia sahihi za kumuondoa spika wa bunge hilo dr Magreth Zziwa.

Spika Zziwa mwenyewe ndiye aliyetangaza kuahirisha kikao hicho kwa kutumia kanuni za bunge hilo hatua aliyoifikia baada ya wabunge zaidi ya watano kusimama wakitaka suala lake lijadiliwe ndani ya bunge huku wengine wakipinga wakidai suala hilo liko mahakamani.

Spika Zziwa na baadhi ya wabunge wanaomuunga mkono waliwasilisha kesi kwenye mahakama ya Afrika Mashariki wakitaka ufafanuzi wa kisheria kuhusu hatua zinazoweza kuchukuliwa ili kuleta bungeni hoja ya kumng'oa spika.

Bunge hilo lilitarajiwa kumaliza vikao vyake tarehe 4 ya mwezi April mwaka huu, lakini kufuatia hatua ya kuahirishwa kwa vikao vyake sasa haijulikana lini litarejea kwenye vikao vyake.