WARUNDI WAISHIO NJE YA BURUNDI WAANDAMANA KATIKA MAENEO MBALIMBALI BARANI MAEEKANI NA ULAYA

Kumeripotiwa maandamano makubwa mjini Brussels Ubelgiji hapo jana na leo asubuhi, maandamano yanayodaiwa kufanywa na raia wa Burundi wanaoishi barani Ulaya wakipinga hatua ya Serikali yao kutaka kufanyia mabadiliko katiba ya nchi na rais Kuongezewa muhula mwingine wa tatu. Jambo ambalo wanasema ni kinyume cha sheria ya nchi hiyo.

Maandamano hayo ya jijini Brussels yanakuja baada ya yale yaliotokea huko Marekani mwishono mwa Juma lililopita na katika maeneo mengine barani Ulaya

Mbali na kupinga kufanyika kwa mabadiliko yoyote ya katiba ya nchi, raia hao wanataka serikali iheshimu uhuru wa vyombo vya habari pamoja na kutominya uhuru wa vyama vya upinzani kufanya siasa za wazi zinazokosoa mwenendo wa Serikali.

Maandamano haya yanafanyika wakati huu ambapo nchi ya burundi inashuhudia mabadiliko makubwa ya kisiasa na kiutawala ambapo baadhi ya viongozi wa upinzani wamejikuta wakiwekwa kizuizini na Serikali kwa tuhuma za kutaka kuchochea vurugu nchini humo hatua ambayo hata Umoja wa Mataifa umeonya kuendelea kushuhudiwa kwa hali hiyo.