PAPA FRANCIS AOMBA RADHI KUFUATIA KASHFA YA KULAWITI WATOTO DHIDI YA MAPADRI NA MAASKOFU

Kwa mara ya kwanza toka uteuzi wake mwaka uliopita, kiongozi wa kanisa katoliki duniani Papa Francis hii leo ameomba radhi hadharani kufuatia kashfa ya kulawiti watoto dhidi ya mapadri na maaskofu wa kanisa hilo.

Akizungumza na kituo cha redio cha kanisa mjini Vatican, Papa Francis ameomba radhi kwa niaba ya kanisa kwa familia na watoto waliofanyiwa vitendo vya udhalilishaji.

Papa Francis amekiri kanisa lake kufahamu matukio ya watoto kudhalilishwa na kwamba wanarekebisha makosa yaliyojitokeza na kuahidi kuwashughulikia kidini viongozi wote waliohusishwa kwenye tuhuma ya kulawiti watoto wadogo.

Hivi karibuni kanisa hilo lilijikuta kwenye shinikizo kubwa baada ya ripoti ya haki za binadamu ya Umoja wa Mataifa kulaani vitendo hivyo na kulitaja moja kwa moja kanisa katoliki kwa kuwafumbia macho mapadri waliohusika na vitendo hivi.