NDEGE YA GUINEA YAZUILIWA KWA SAA KADHAA KWENYE UWANJA WA NDEGE WA UFARANSA

Ndege ya Ufaransa iliyokuwa ikitokea nchini Guinea ambako kumeripotiwa ugonjwa wa Ebola, imetengwa kwa muda wa saa mbili jijini Paris leo Ijumaa, baada ya timu ya marubani kuhisi kuwepo kwa abiria mwenye virusi vya ugonjwa huo hatari, shirika la ndege hiyo limearifu.

Ndege hiyo imetua kwenye uwanja wa ndege wa Charles De Gaulle jijini Paris majira ya asubuhi ikiwa na abiria 187 na timu ya marubani wapatao 11 ambapo wahudumu wa dharura walifanya ukaguzi kwa wasafiri wote baada ya choo kichafu kuzusha wasiwasi wa kuwepo kwa mgonjwa wa Ebola, ambao miongoni mwa dalili zake ni kuharisha.

Hata hivyo matokeo ya uchunguzi huo yameonesha kutokuwepo kwa ugonjwa huo miongoni mwa wasafiri msemaji wa ndege hiyo amesema

Ugonjwa wa ebola unaweza kuambukizwa kwa binadamu kutoka kwa wanyama wa msituni na kati ya mtu na mtu kwa njia ya kugusana moja kwa moja kwa damu,kinyesi ama jasho .

Aidha kujamiiana na kutohifadhi kwa uangalifu maiti ya mgonjwa wa ebola pia huweza kusababisha maambukizi.

Mamlaka nchini Guinea zimeripoti matukio 134 ya ugonjwa wa Ebola tangukuanza kwa mwaka huu ambapo matukio 86 yamesababisha vifo.