WAZIRI WA SHERIA NCHINI AFRIKA KUSINI JEFF RADEBE AIONYA RWANDA KUHUSU VITENDO VYA KIJASUSU NCHINI MWAKE

Waziri wa sheria nchini Afrika Kusini Jeff Radebe

Serikali ya Afrika Kusini imezungumzia kwa mara ya kwanza kuhusu mgogoro wa kidiplomasia baina yake na nchi ya Rwanda.

Afrika Kusini imeionya nchi ya Rwanda na kudai kuwa ardhi yake haitatumika kama uwanja wa vita kati yake na mataifa ya magharibi siku chache baada ya taifa hilo kuwafurusha maofisa wake watatu wanaotuhumiwa kupanga njama kuwashambulia wanasiasa wa Rwanda wanaoishi nchini humo.

Akizungumza na wanahabari mjini Pretoria, waziri wa sheria, Jeff Radebe amesema kuwa kamwe nchi yake haitakubali kuona taifa lolote lile duniani likitumia ardhi yake kufanya shughuli zozote ambazo zinahatarisha usalama wa nchi na raia wake.

waziri huyo amesema kuwa wana ushahidi kuwa maafisa wa ubalozi wa Rwanda na mmoja wa Burundi wamehusika katika majaribio ya mauaji ikiwemo ya mpizani mmoja kutoka Rwanda.

Hivi karibuni makazi ya Jenerali Kayumba Nyamwasa yalishambuliwa na kabla ya hapo mapema mwaka huu, aliyekuwa mkuu wa upelelezi nchini Rwanda Patrick Karegeya alekutwa ameuwawa katika hoteli moja mjini Johannesburg.

Louise Mushikiwabo waziri wa mambo ya nje nchini Rwanda

Katika hatua nyingine Serikali ya Rwanda imejibu mapigo kupitia waziri wake wa mambo ya Kigeni, Louis Mushikiwabo ambaye kupitia mtandao wa Twitter ameitaka Afrika kusini kuacha kuwapa hifadhi wahaini wa nchi hiyo ama sivyo ikubali gharama ya kile kinachotokea.