SERIKALI YA UGANDA YATAHADHARISHA JUU YA MBINU MPYA ZA WANAMGAMBO WA AL SHABAB KUTEKELEZA MASHAMBULIZI

Askari wa jeshi la Uganda katika kikosi cha Amisom

Serikali ya Uganda imeonya kuhusu mbinu mpya zinazopangwa na wapiganaji wa kundi la Al-Shabab nchini Somalia na kwamba wanamgambo hao wanapanga kutumia magari ya mafuta kutekeleza uhalifu wao, siku moja baada ya serikali ya Kenya kubaini bomu kwenye gari moja.

Uganda inasema imepokea taarofa kuhusu kuwepo mpango wa wapiganaji hao kutekeleza shambulio mjini Kampala na kwenye nchi zenye wanajeshi wake nchini Somalia na kwamba wanaongeza usalama.

Tangazo la Uganda inakuja wakati huu ambapo wapiganaji wa Al-shabab wameendelea kutekeleza mashambulizi yao dhidi ya wanajeshi wa kulinda amani na vikosi vya Serikali ya Somalia.

Wakati huo huo taarifa kutoka nchini Somalia zimearifu kuwa watu kadhaa wamepoteza maisha katika shambulio la kujitowa muhanga lililotokea katika hoteli moja mjini Buula Burde nchini Somalia, mji ambao ulirejeshwa mikononi mwa serikali ya Somalia Ijumaa Juma lililopita baada ya majeshi ya Umoja wa Afrika Amisom kuwafurusha wanamgambo wa Al Shabab.

Duru za serikali nchini Somalia zimearifu kuwa askari wanne wa Djibouti waliomo katika kikosi cha Amisom, wamepoteza maisha katika shambulio hilo.

Mashahidi wanasema watu nane wamepoteza maisha baada ya gari lililokuwa limebeba mabomu kulipuka jana usiku katika hoteli ambayo walikuwa wamepiga kambi viongozi wa kijeshi wa Amisom kabla ya kufuatiwa na mashambulizi ya risase.