UMOJA WA ULAYA EU WAITAKA SERIKALI YA DRCONGO KUHESHIMU HAKI YA UPINZANI

Ujumbe wa Umoja wa Ulaya nchini jamhuri ya Kidemokrasia ya Congo, umeitolea wito serikali ya nchi hiyo juu ya heshima ya haki za upinzani, wito ambao umekuja siku mbili baada ya kutokea matukio ya kumzuia kiongozi wa upinzani Vital Kamerhe kusafiri kutoka Kinshasa kuelekea mjini Goma.

Katika taarifa iliotolewa na Umoja huo imesema wakati taifa hilo likijiandaa kuelekea kwenye uchaguzi wa madiwani, Mikoa, Wabunge na ule wa rais mwaka 2016, ni muhimu kwa serikali ya rais Kabila kuheshimu haki ya kujitetea haki ya upinzani na kutowa uhuru kwa wapinzani kutembelea maoeneo yote watakayo

Ujumbe huo wa Umoja wa Ulaya umesema unatiwa wasiwasi na hatuwa ya serikali kuwazuia wapinzani kutembelea maeneo watakayo, na hivi karibuni ni kuzuiliwa kwa rais wa chama cha UNC Vital Kamerehe ambaye amezuiliwa kuzuru mji wa Goma.

Vital Kamerhe ambaye alichukuwa nafasi ya tatu katika uchaguzi mkuu uliopita, wa mwaka 2011 na ambao upinzani ulilalamika kugubikwa na udanganyifu, alijikuta akizuiliwa kusafiri kuelekea mjini Goma siku ya Ijumaa na Jumapili ambako alipanga kuanzisha mpango wa kuhamasisha amani katika eneo hilo lenye kukumbwa na machafuko.