IKULU YA RAIS JIJINI MOGADISHU YAREJEA KWENYE UMILIKI WA VIKOSI VYA SERIKALI BAADA YA MAKOMANDO WA AL SHABAB KUSHAMBULIA

Hatimaye Ikulu ya Mogadishu nchini Somalia imerejea kwenye umiliki wa vikosi vya Serikali, kufuatia mashambulizi ya makomandoo wa Al-Shabab waliojaribu kuvamia ikulu ya rais.

Waziri wa ulinzi wa Somalia, Abdikarim Hussein Guled amewaambia wanahabari mjini Mogadishu kuwa baada ya saa kadhaa za makabiliano kati ya vikosi vya Serikali na wanamgambo hao wamefanikiwa kuwafurusha na kuilinda Ikulu ya rais Hassan Sheikh Mohamud.

Wanamgambo wa Al-Shabab walitumia magari kujitoa muhanga na kurusha maroketi kwenye Ikulu lakini hawakufanikiwa kuingia ndani, kufuatia ulinzi mkali uliopo kwenye Ikulu ua Mogadishu.

Umoja wa Mataifa UN umesema kuwa rais, Hassan Sheikh Mohamud hakujeruhiwa kwenye shambulio hilo, ambalo ni kubwa zaidi kuwahi kufanywa na wanamgambo hao kulenga Ikulu ya Mogadishu.