MAANDAMANO MAPYA YAITISHWA TENA LEO JUMATATU NA UPINZANI NCHINI BURUNDI

Upinzani nchini Burundi imetowa wito wa maandamano tena leo Jumatatu April 20 mwaka 2015 katika jiji kuu la Bujumbura. Wito huu umetolewa na mmoja kati ya viongozi wa upinzani wa chama cha UPD-Zigamibanga Chauvino Murwengezo ambae amewataka wafuasi wa upinzani na wale wote wanaopinga muhula wa 3 wa rais Pierre Nkurunziza.

Hayo yanajiri wakati mwishoni mwa Juma mahakama kuu jijini Bujumbura ikiwafungulia Mashtaka waandamanaji 65 waliokamatwa wakati wa maandamamno ya kumshinikiza rais Piere Nkuzrunziza kutowania urais kwa muhula wa tatu.

Siku ya Ijumaa juma lililopita shughuli zilizorota kutokana na vurugu za maandamano ambapo Polisi wa Usalama waliwasambaratisha waandamanaji ambao walidai kuandamana kwa amani na utulivu.

Kidole cha lawama kinaelekezwa kwa vyombo vya Usalama nchini humo ambavyo vimeonekana kuegemea upande mmoja, kwani wafuasi wa rais Nkurunziza wanaounga mkono muhula wa 3 wanapoafanya maandamano hupewa ulinzi mkali wa polisi.

Kiongozi mmoja wa upinzani amesema iwapo machafuko yatatokea au vurugu, zinasababishwa na polisi na wao ndio wataulizwa kupitia viongozi wao ambao hawataki kutowa haki sawa kwa wote.

Hali hii ya wasiwasi inayo shuhudiwa kwa sasa nchini Burundi imesababisha watu zaidi ya elfu nane kukimbilia nchini Rwanda na DRCongo kwa hofu ya kuzuka kwa machafuko.

Upinzani pamoja na Mataifa ya Magharibi yanamtaka rais Nkurunziza kuheshimu katiba na kutowania wadhifa huo wakati wa Uchaguzi wa urais mwezi Juni.

Nkurunzinza mwenyewe hajajitokeza na kutangaza ikiwa atawania au la.