RAIS MPYA NCHINI TANZANIA AHUTUBIA BUNGE, WAPINZANI WAONDOKA UKUMBUNI

Rais wa Jamhuri ya muungano wa Tanzania, John pombe Magufuli, hii leo kwa mara ya kwanza amelihutubia bunge huku akiahidi kuwa serikali yake itafanya kazi kwa weledi, wakati huu pia akimwapisha waziri mkuu mpya, Majaliwa Kassim Majaliwa.

Ni sauti yake waziri mkuu mpya wa Tanzania, Majaliwa Kassim Majaliwa, wakati akila kiapo hii leo mjini dodoma katika ikulu ndogo ya Chamwino, sherehe ambayo mbali na kuhudhiriwa na rais wa Zanzibar na viongozi wastaafu, wabunge na wageni mbalimbali nao walihudhuria.

Baada ya sherehe za kuapishwa kwa waziri mkuu, baadae wabunge walirejea bungeni ambako rais wa jamhuri ya muungano wa Tanzania, John Pombe Magufuli aliwahutubia, ikiwa ni mara yake ya kwanza kufanya hivyo toka alipoteuliwa kuwa rais baada ya uchaguzi wa October 25 mwaka huu.

Kwenye hotuba yake rais Magufuli, aliwashukuru wananchi kwa mara nyingine kwa kumuamini na kumchagua, ambapo ameahidi kuwa kiongozi atakayewatumikia watu wote bila kubagua, na kwamba lengo lake ni kuhakikisha nchi ya tanzania inasonga mebel kimaendeleo.

Rais Magufuli pia kwenye hotuba yake pia akaeleza malalamiko aliyoyapokea kwa wananchi ambayo yeye anaona ni kero kwa wananchi, maeneo ambayo anasema ni lazima yashughulikiwe ipasavyo ili kuleta uaminifu kwa wananchi.

Kuhusu Uchumi rais Magufuli amesema kuwa serikali yake itakuwa ni serikali ya viwanda itakayosimamia sheria na kuhakikisha kuwa uchumi wa nchi unasimama kwa kujenga na kuendelea viwanda ili kutengeneza ajira zaidi.

katika hotuba yake pia, rais magufuli hakuacha kugusia suala la katiba mpya, ambapo amesema atahakikisha serikali yake inasimamia mchakato huo na kwamba safari hii utakamilika kwa wakati.

Rais Magufuli pia akagusia suala la muungano pamoja na hali ya kisiasa visiwani zanzibar ambapo amesema yeye ni muumini mkubwa wa muungano uliopo na kwamba anaamini mgogoro wa zanzibar uliojtokeza unatatuliwa kwa amani.

Kabla ya kuanza kwa hotuba yake bungeni, rais Magufuli alishuhudia vioja vya upinzani ambao walikuwa wakipiga kelele wakati viongozi wa zanzibar walipokuwa wakiingia bungeni bungeni, ambapo baadae spika wa bunge Job Ndugai alilazimika kutumia kiti chake kuwafukuza nje ya ukumbi wa bunge ili kupisha hotuba ya rais kuanza, jambo ambalo upinzani ulitii na kutoka nje.

OFISI YA ICGLR KUHAMISHWA KWA MUDA NCHINI ZAMBIA

Ofisi za Jumuiya ya nchi za maziwa makuu ICGLR yenye makao makuu mjini Bujumbura, Burundi, zitahamishia kwa muda shughuli zake mjini Lusaka, Zambia, kwa kile maofisa wake wanachosema kuwa ni hali tete ya kiusalama nchini humo.

ICGLR inasema kuwa kutokana na kuendelea kuzorota kwa hali ya usalama nchini Burundi, ofisi hiyo itahamishia kwa muda shughuli zake nchini Zambia, wakati mzozo wa nchi hiyo ukiendelea kutatuliwa na taasisi husika ikiwemi ICGLR, Jumuiya ya Afrika Mashariki na Umoja wa Afrika.

MASHIRIKA 6 KATIKA JUMUIYA YA AFRIKA MASHARIKI WAOMBA KIKAO CHA DHARURA KUHUSU BURUNDI

Mashirika sita ambayo yote yamesajiliwa ndani ya Jumuiya ya Afrika Mashariki na nchi wananchama, juma hili yamewasilisha hoja kwa spika wa bunge la Jumuiya ya Afrika Mashariki wakimtaka aitishe mkutano wa dharura wa wabunge na kutoa tamko kuhusu machafuko yanyoendelea kushuhudiwa nchini Burundi.

Mashirika hayo, yanatoa wito wa kuchukuliwa kwa hatua madhubuti na za haraka kushughulikia mzozo wa kisiasa na hali ya kibinadamu nchini Burundi, wakati huu mashirika hayo yakidai kuwa hali imezidi kuwa mbaya kwenye taifa hilo hukuviongozi wa Burundi wakikaidi maazimio kadhaa ya wakuu wa nchi za Afrika mashariki na Umoja wa Afrika.

Katika hoja yao, mashirika hayo yanataka kuwekewa vikwazo kwa viongozi wa Burundi, kupelekwa kwa waangalizi wa kimataifa pamoja na wanajeshi wa Umoja wa Afrika watakaolinda usalama wa raia.

Spika wa bunge la Afrika Mashariki, Dan Kidega amepokea hoja ya mashirika hayo, na kusema kuwa imekuja wakati muafaka kwakuwa hali inayoendelea kushuhudiwa nchini Burundi, haiwezi kuendelea kutazamwa bila ya kuchukuliwa hatua.

WAPIGANAJI 2 WADAIWA KUUWA NCHINI MALI KATIKA HOTELI WALIKOVAMIA

Taarifa za hivi punde zinaeleza kwamba washambuliaji wawili waliokuwa miongoni mwa watu waliosambulia na kuwateka watu katika Hoteli moja jijini Bamakao wameuawa wakati wa operesheni za uokozi.

Hayo yanajir wakati huu Wizara ya mambo ya ndani nchini Ufaransa, imethibitisha kupelekwa kwa kikosi maalumu cha wanajeshi wa kukabiliana na ugaidi na hali ya hatari nchini Mali, ambako wanamgambo wenye silaha wanashikilia mateka wat zaidi ya 150 kwenye hoteli moja mjini Bamako.

Zaidi ya wanajeshi 40 wa kikosi maalumu cha Ufaransa cha GIGN wanaelekea nchini Mali kutoa msaada kwa vikosi vya Mali kujaribu kuwaokoa mateka wanaoshikiliwa kwenye hoteli ya Radisson Blu, hoteli inayowahifadhi wageni na maofisa kadhaa wa Umoja wa Mataifa.

Hatua hii ya Ufaransa imekuja ikiwa ni saa chache tu zimepita toka wapiganaji wenye silaha kuvamia hoteli hiyo na kuwashikilia mateka wageni waliofikia kwenye hoteli hiyo.

RAIA WA NIGERIA ASEMA WAHUSIKA WA RUSHWA JESHINI WATAKABILIANA NA MKONO WA SHERIA

Rais wa Nigeria, Muhammadu Buhari, anasema kuwa jeshi lake lilinyimwa silaha na misaada mingine ya kijeshi kukabiliana na kundi la Boko Haram na maelfu ya raia kupoteza maisha kwasababu kulikithiri vitendo vya rushwa wakati wa ununuzi wa baadhi ya vifaa.

Rais Buhari amesema kuwa anataka wale wote watakaobainika kuwa walihusika katika kashfa hiyo ya mamilioni ya fedha wakati wa ununuzi wa zana za kijeshi, kufikishwa mbele ya vyombo vya sheria, kauli anayoitoa punde baada ya kupokea ripoti ya tume iliyoundwa kuchunguza tuhuma za rushwa ndani ya jeshi.

Ripoti hiyo imeonesha kuwa kulikuwa na mazingira tatanishi ya manunuzi ya zana hizo kwakuwa amri ya kununua vifaa ilitolewa wakati jeshi likiwa kwenye mapambano na wapiganaji wa Boko Haram kaskazini mwa nchi hiyo.

MAREKANI YALAANI HATUWA YA KUIDHINISHWA KWA SHERIA YA MAREKEBISHO YA KATIBA NCHINI RWANDA

Siku moja baada ya bunge nchini Rwanda kupitisha rasmi mependekezo ya kufanyika marekebisho kwenye katiba ya nchi hiyo ili kumpa nafasi nyingine rais Paul Kagame kuwania urais kwa muhula wa tatu mfululizo, serikali ya Marekani imelaani hatua hiyo ya bunge la Seneti.

Kwa mujibu wa taarifa iliyotolewa na wizara ya mambo ya kigeni ya Marekani, haikusema wazi iwapo misaada ya Marekani kwa nchi ya Rwanda itasitishwa lakini ikaonya kuhusu kupitiwa upya kwa mikataba ya ushirikiano kati ya nchi hizo mbili.

Marekani inamtaka rais Kagame kuheshimu kile alichowahi kukisema kuhusu kuendelea kizazi kijacho cha Rwanda kwenye utawala, na kuachana na mpango wake wa kuwania urais mwaka 2017.

KENYA YATANGAZA MIKAKATI MIPYA YA UBANAJI MATUMIZI

Baada ya majuma kadhaa ya tuhuma mbalimbali za rushwa na matumizi mabaya ya fedha, Serikali ya Kenya imetangaza mikakati mipya ya ubanaji matumizi, ambapo imepiga marufuku safari na mafunzo yasiyo ya lazima kwa wafanyakazi wa umma.

Waziri wa fedha Henry Rotich amesema kuwa tayari ameshatoa waraka kwa maofisa wa wizara na vitengo mbalimbali vya uma, akipiga marufuku safari za nje na matumizi mengine yasiyo ya lazima.

Waziri Rotich amesema safari za mafunzo za ndani na zile za kaunti zimepigwa marufuku.

Hatua hii itasaidia Serikali ya Kenya kupunguza matumizi makubwa yanayolalamikiwa na upinzani pamoja na wananchi? Mwenzangu Victor Abuso amezungumza na James Shikwati mchambuzi wa masuala ya Uchumi akiwa jijini Mwanza nchini Tanzania.