KUNDI LILILO ASI CHAMA CHA FNL LAKIRI KUHUSIKA KATIKA SHAMBULIO LA JESHI LA BURUNDI

Kundi moja la waasi nchini Burundi, limejigamba hapo jana kuhusika katika shambulio dhidi ya kituo kimoja cha kijeshi nchini humo karibu na mpaka na jamhuri ya kidemokrasia ya Congo, na kukiri kuwauwa wanajeshi sita katika shambulio hilo, idadi iliokanushwa na jeshi la taifa hilo.

Msejaji wa jeshi la Burundi kanali Gaspard Baratuza amefahamisha kwamba kulikuwa na makabiliano na kundi la wahuni, na kukanusha taarifa ya kupoteza wanajeshi, badala yake kuthibitisha kuwa wamemuua muasi mmoja katika shambulio hilo.

Kundi hilo la waasi linasadikiwa kuwa ni miongoni mwa wafuasi wa chama cha FNL walioasi na kuanzisha uasi. Kulingana na msemaji wa kundi hilo Felix Jean Ntahonguriye amethibitisha kwamba walishambulia kituo cha jeshi kilichopo katika tarafa ya Gihanga kwenye umbali wa kilometa zaidi ya Ishirini na jiji la Bujumbura na baadae kutokomea katika msitu wa Rukoko karibu na DRCongo.

Tangu mwanzoni mwa mwaka huu, kundi hilo limekuwa likijigamba kuhusika na mashambulizi kadhaa ambapo kulingana na msemaji wa kundi hilo wataendelea kutekeleza mashambulizi dhidi ya vituo vya jeshi la Burundi hadi kwenye uchaguzi wa mwaka 2015.

msemaji wa jeshi la Burundi Gaspard Baratuza amepuuzia kitisho hicho na kusema kwamba ni kundi la wahuni waliopoteza dira na haliwezi kupambana na jeshi la serikali.